Украина шаҳарлари дрон ҳужумига тутилди
Россия Украинанинг шимоли-шарқидаги Харков шаҳрини 3 ноябрга ўтар кечаси дрон ҳужумига тутди.
Ярим тунда Россия Харковга камида 10 та дрон учирган. Шаҳарнинг баъзи жойларида ёнғинлар рўй берган, бироқ қурбонлар ҳақида маълумот йўқ.
Харков мери Игор Терехов ўт ўчирувчилар ёнғин билан курашаётганини айтди, бироқ батафсил маълумот бермади.
Президент Владимир Зеленскийнинг маслаҳатчиси Андрей Ермакнинг айтишича, Украина кучлари бир кечада Эрон томонидан ишлаб чиқилган 24 та ҳужумчи дронларни уриб туширган.
Украина Бош штаби 3 ноябр куни эрта тонгда “душман Авдиивкани ўраб олишга уринишда давом этмоқда, бироқ украиналик аскарлар ўз жойида туриб, душманга катта талафотлар етказмоқда”, деди.
Сўнгги хабарларга кўра, Москва Авдиивка ҳудудига қўшимча қўшин ташлаган.
2 ноябр куни кечки пайт Россия Мудофаа вазирлиги ўз кучлари Россия томонидан кенг кўламли урушнинг дастлабки ҳафталаридан бери босиб олинган Запорижья атом станцияси яқинида тўққизта Украина дронини уриб туширганини даъво қилди.
Озодлик радиоси энг шиддатли жанглар бўлган ҳудудларда жанг майдони ҳақидаги даъволарни мустақил равишда тасдиқлай олмайди.
Украинанинг олий қўмондони генерал Валерий Залужний шу ҳафта The Economist журналида чоп этилган интервюсида Украина ва босқинчи Россия кучлари ўртасидаги жангдаги ҳозирги вазиятни Биринчи жаҳон урушидаги жангларга ўхшатди.
Унинг сўзларига кўра, бундай шароитда "ҳеч қандай ютуқ" бўлиши мумкин эмас.
БМТ: Гроза қишлоғидаги кафега ҳужумни Россия уюштирган дейишга асос бор
Бирлашган Миллатлар Ташкилотининг Инсон ҳуқуқлари бўйича идораси Украинанинг Гроза қишлоғидаги кафеда 59 кишининг ҳаётига зомин бўлган ракета зарбасини Россия уюштирганини тасдиқловчи далиллар топганини маълум қилди.
БМТ Инсон ҳуқуқлари бўйича Олий комиссарлиги матбуот котиби Лиз Тросселл Женевада журналистлар билан суҳбатда “ракета Россия қуролли кучлари томонидан учирилган деб ҳисоблаш учун асосли далиллар бор” деди.
“5 октябр куни Украина шарқидаги Гроза қишлоғидаги кафеда дафн маросимига йиғилган 59 киши ҳалок бўлган эди. Бу, ўшанда айтганимиздек, 2022 йил февралидан бери тинч аҳоли учун энг ҳалокатли воқеалардан бири бўлган. Бугун биз ўша воқеалар ҳақидаги ҳисоботни эълон қилдик, жўяли далилларни қўлга киритиб, ҳужум Россия қуролли кучлари томонидан қилинган деган хулосага келдик”, деди Тросселл.
Украинанинг маълум қилишича, 5 октябр куни ҳалок бўлган украиналик аскарни мотамга йиғилганлар Харков вилоятидаги қишлоқдаги кафега рус ракетаси келиб тушган. Москва ўз босқинида тинч аҳолини нишонга олганини рад этиб келади.
Россия Мудофаа вазирлиги сешанба кунги ҳисоботга дарҳол изоҳ бермади.
Ҳисоботда айтилишича, ҳужумда қўлланган бўлиши мумкин бўлган қурол, яъни “Искандар” ракетаси Россия қуролли кучларининг арсеналида бор, Украина бундай қуролга эга эмас.
24 соат ичида жабҳада 43 та тўқнашув
Россия ўз кучлари сўнгги 24 соат ичида турли жабҳаларда украин кучларига қарши зарба бергани, Украина эса ўз армияси худди шу вақт ичида бир нечта рус ҳужумларини қайтарганини билдирди.
Россия Мудофаа вазирлигининг хабар беришича, Россия кучлари Украина шарқидаги Купянск ва Лиман йўналишида Украина қўшинларининг иккита ҳужумини қайтарган. Улар шарқда Донецкда Украинанинг учта бригадасининг самаралари ва жиҳозларига ҳужум қилишган.
Бундан ташқари, Россия қўшинлари Украина шимоли-шарқидаги Харков вилоятида Украина армиясининг махсус бригадасининг кўплаб ўқ-дори омборларини ҳам йўқ қилганини иддао қилди.
Ўз навбатида Украина Қуролли кучлари Бош штаби охирги 24 соат ичида жабҳага яқин ҳудудларда 43 та тўқнашув бўлгани ҳақида ҳисобот эълон қилди.
Украина армияси Украина шарқидаги Авдиивка, Купянск ва Маринка йўналишида Россиянинг бир неча ҳужумларини қайтарган. Украина кучлари Украина жануби-шарқидаги Мелитопол ва шарқий Украинадаги Бахмут йўналишида рус кучларига қарши ҳужумга ўтган.
Россияликлар урушни тухтатишни хоҳлайдими?
Россиянинг Левада маркази таҳлилий маркази томонидан ўтказилган сўров натижаларига кўра, Россия аҳолисининг учдан бир қисмидан сал кўпроғи (34%) Путиннинг “Украина билан ҳарбий можарога чек қўйиш ва Украинанинг аннексия қилинган ҳудудларини қайтариш” қарорини қўллаб-қувватлайди.
Путин босиб олинган ҳудудларни қайтариш шартисиз урушни тугатадими, деган саволга респондентларнинг 70 фоизи буни қўллаб-қувватлади.
Сўралган Россия фуқароларининг 55 фоизи урушни тўхтатиш ва тинчлик музокараларини бошлаш керак, деб ҳисоблайди, 38 фоизи жанговар ҳаракатларни давом эттириш тарафдори.
Бу эса 2022 йилнинг июл ойида Левада маркази ўтказган сўров натижалари:
Октябр бошида Gallup томонидан эълон қилинган сўров натижаларига кўра, деярли барча украиналиклар урушда ғалаба қозониш “Россия 2014 йилдан бери эгаллаб олган барча ерларни қайтариши деганидир” фикрига қўшилган.