Украина Бош штаби: Россия қўшинлари етти йўналишда ҳужум қилмоқда
Россия қўшинлари Украина шарқи ва жанубидаги етти йўналишда ҳужум ҳаракатларини олиб бормоқда, дейилади Украина Бош штаби 26 октябр тонгида эълон қилган хабарномада.
Маълум қилинишича, сўнгги суткада 78 та жанговар тўқнашув содир бўлган. Энг қақшатқич жанглар Донбасснинг Авдеевка, Бахмут, Купянск, Лиман, Марьинка ва Шахтёрск йўналишларида ҳамда мамлакат жанубидаги Запорожье йўналишида бўлаётгани айтилмоқда. Бош штабга кўра, Украина ҚК россияликларнинг барча ҳужумларини қайтариб, ўз навбатида, Мелитополь йўналишида ва Бахмут шаҳри атрофида ҳужум ҳаракатларини олиб бормоқда.
Россия Мудофаа вазирлиги кеча илк бор, Украинага Қўшма Штатлар томонидан етказиб берилган иккита ATACMS ракетасини уриб туширганини эълон қилди.
Озодлик жанговар ҳаракатлар шароитида томонларнинг хабарларини мустақил манбалар орқали тасдиқлаш имконига эга эмас.
Озодлик уруш шароитида томонлар бераётган маълумотларни мустақил манбалардан тезкор тасдиқлаш имконига эга эмас.
Россия бир кунда Украинанинг 9 та вилоятини ўққа тутди
Россия бир кунда Украинанинг 9 та вилоятини ўққа тутди, 128 та аҳоли пункти ва 64 та инфратузилма объектига ҳужум қилди, дея хабар берди Украина Ҳарбий медиа маркази.
Россия қўшинлари биргина Херсон вилоятига бир кунда 35 та бошқариладиган бомба ташлади. Вилоят маъмурияти раҳбари Александр Прокудинга кўра, ўлганлар ва жароҳатланганлар бор.
Чоршанба куни кечқурун Хмелницкий вилоятида рус дронларининг ҳужуми натижасида 20 киши жабрланди: жами 11 та "Шаҳед" ҳужум қилгани, уларнинг барчаси отиб тушурилгани, аммо вайроналар Хмельницкий атом электр станцияси яқинига тушиб, маъмурий бинолар ва электр узатиш линияларига зарар етказгани айтилди. Шу муносабат билан Зеленский Украина ҳаво ҳужумидан мудофаа тизимини кучайтириш зарурлигини эълон қилди ва МАГАТЭ раҳбари кейинги сафар бундай зарбанинг оқибатлари анча оғирроқ бўлиши мумкинлигини эслатди.
Ишдан бўшатилган Сатановский "бузуқ хотин" ва "ахлат" сўзлари учун кечирим сўради
Шарқшунос ва сиёсатшунос, Россия яҳудийлар конгрессининг собиқ президенти Евгений Сатановский кремлпараст“Соловьёв LIVE” каналидан бўшатилди. Сатановский у ерда эксперт бўлиб ишлаб келаётган эди. Ишддан бўшатилишига унинг Россия ТИВ расмий вакили Мария Захарова ҳамда ташқи ишлар вазири ўринбосари Михаил Богданов шаънига кескин гапиргани сабаб бўлган. Бу ҳақда телебошловчи Владимир Соловьёв маълум қилди.
Сатановский исроиллик журналист Александр Вальдманнинг ютуб-каналида узатилган дастурда иштирок этган, улар Исроил ва ҲАМАС ўртасида ҳозирда давом этаётган можарони муҳокама қилганлар.
Сатановский суҳбат асносида элчи ва дипломат Богдановни “ароққа муккасидан кетган муовин”, Захаровани эса “доим ичиб юрадиган бузуқ хотин” деб атаган, уларнинг “Исроилни кўргани кўзлари йўқ”, дея қўшимча қилган.
Ундан ташқари, ўша куни бироз кайфияти йўқ Сатановский Путиннинг издоши Дмитрий Медведевнинг бурнини ерга ишқалаб, уни “майда, заиф ахлат” деб атади:
“Менимча Россиянинг қулаш эҳтимоли 30-йилларда тўғри келади, чунки Путин абадий эмас, у қариб бормоқда. Ҳар доимгидек, кучли раҳбарлар атрофига доимо заифларни йиғишади. Путин ҳокимиятни сақлаб қолиш нуқтаи назаридан жуда кучли. ... Демак, худди шу кадрлардан у ўз ўрнига қандайдир майда, заиф ахлатни қўяди. Мана, Медведев бунга мисол”, деди Сатановский эфирдаги чиқишида.
Бугун Сатановский Захарова ҳамда Богдановдан узр сўраб, “чин юракдан афсусда” эканини билдириб чиқди .
Украина фронтолди ҳудудларидан болаларни эвакуация қилмоқда
Украина реинтеграция вазирлиги, Россия босқини хавфи юзага келгани сабабли Донецк ва Херсон вилоятларининг Киев назоратидаги бир неча аҳоли масканидан болалар эвакуация қилинишини эълон қилди.
Вазирлик хабарига кўра, Донецк вилояти Бахмут ва Покров туманларидаги саккиз аҳоли масканидан 250 га яқин бола эвакуация қилинади. Улар дастлаб гуманитар хабга олиб келиниб, зарур ёрдам оладилар, шундан сўнг болалар Житомир вилоятига жўнатилади.
Херсон вилоятининг Берислав, Каховка ва Херсон туманларидаги 23 аҳоли масканидан 802 нафар бола кўчирилади. Уларни Хмельницкий, Николаев, Одесса ва Львов вилоятларига юборишади. Қарийб 100 нафар болани Ивано-Франковск вилоятидаги санаторийга жойлаштириш кўзда тутилган.
Айни пайтда Херсон ва Донецк вилоятларида жанглар бўлмоқда. Афтидан, болаларни кўчириш зарурати ҳарбий ҳаракатлар фаоллашгани билан боғлиқ: Россия армияси бир ҳафтадирки, Авдеевка шаҳрини ишғол қилишга уриняпти. Шунингдек, Россия аҳоли масканларини ўққа тутишни кучайтиргани ҳам эвакуация сабабларидан биридир. Ўтган ҳафта, 20 октябр куни вилоят ҳарбий маъмурияти раҳбари Александр Прокудин Россия ҳарбийлари Бериславга тўртта авиабомба ташлаганини маълум қилди. 22 октябрда эса Россия Торецк шаҳрини ҳамда Донецк вилоятининг учта қишлоғини бомбалади.
Ёз фасли охирларида Украина ҳукумати Харьков вилоятининг 37 ва Запорожье вилоятининг 5 аҳоли масканида эвакуация эълон қилган эди.