Россия тунда Украинага ракета ва дронлар билан ҳужум қилди
19 октябрга ўтар кечаси Россия қўшинлари Украинага “Искандер-М” баллистик ракеталари, “Шаҳед” типидаги дронлар ва зенит-ракеталар билан ҳужум қилди, деб хабар берди Украина Ҳарбий ҳаво кучлари.
Украина ҳарбийларига кўра, улар бешта “Искандер-М” баллистик ракетасини, тўққизта “Шаҳед” типидаги дрон, битта С-300 бошқариладиган зенит-ракетасини, битта Кҳ-59 бошқариладиган самолёт ракетасини ва битта қанотли ракетани (тури кўрсатилиши керак) аниқлаган. Таъкидланишича, учта дрон ва Х-59 ракетаси йўқ қилинган.
"Донецк, Николаев, Суми, Днепропетровск ва Запороже вилоятларида объектларга ҳужум уюштирилди. Маҳаллий ҳарбий маъмуриятлар оқибатлари ва қурбонлар ҳақида хабар беради", - дейилади хабарда.
Россия адвокатлари иш ташлашга чақирилмоқда
Россиялик 150 дан ортиқ адвокат “огоҳлантириш акцияси” ўтказиш ва барча турдаги суд ишларига оид процессуал ҳаракатларда иштирок этишни тўхтатишга чақирилган петицияга имзо чекди. Legal Petition сайтида эълон қилинган петицияда Россия Федерал ва ҳудудий адвокатлар палаталарига, шунингдек ҳимоячиларнинг жамоат бирлашмаларига мурожаат қилинган.
Баёнотда адвокатлар процесснинг бошқа иштирокчиларига нисбатан камситилаётгани урғуланади.
“Мурожаат ва аризалар, илтимосномалар, шикоятлар, адвокатларнинг профессионал ҳуқуқлари бузилиши беътибор қолдирилмоқда, ҳаттоки адвокатларнинг давлат органлари томонидан таъқиб қилиниши, уларга нисбатан куч ишлатиш ва таҳдид қилиш ҳолатлари кузатилаётир. Аксари ҳолларда бунақа тажовузлар жазосиз қолдирилади”, дейилади петицияда.
Бундан ташқари, адвокатларга кўра, давлат томонидан тайинланадиган ҳимоячилар кўпинча судларда бажарган ишлари ҳақини вақтида ололмай сарсон бўлишмоқда.
Орбан Путинга содиқлигини билдирди
Россия президенти Владимир Путин ва унинг Европа Иттифоқи етакчилари орасидаги энг яқин иттифоқчиси, Венгрия Бош вазири Виктор Орбан сешанба куни Украинадаги уруш юзасидан халқаро кескинлик фонида икки томонлама алоқаларга содиқлигинияна бир бор тасдиқлади.
Москва кучларига қаршилик кўрсатишда Украинани қўллаб-қувватлаш бўйича Европа Иттифоқининг кўплаб ташаббусларига қарши чиққан ва хом нефт ва газнинг катта қисмини Россиядан оладиган Венгрия ҳеч қачон Россияга қаршилик кўрсатишни истамаган ва икки томонлама алоқаларни сақлаб қолишга ҳаракат қилмоқда, деди Орбан Пекиндаги форум давомида Россия телевидениесида Путинга берган изоҳида.
"Венгрия ҳеч қачон Россия билан тўқнаш келиш мақсадига эга бўлмаган. Аксинча, Венгриянинг мақсади ҳар доим ўзаро мумкин бўлган энг яхши алоқаларни ўрнатиш бўлган. Ва биз бунга муваффақ бўлдик. Лекин "ҳарбий операция" (Украинадаги уруш) ва Европа санкциялари туфайли бу муносабатлар, афсуски, кўп нарсани йўқотди. Бу сиз ва мен биргаликда қурган ҳамкорлик тузилишига чуқур зарар етказди," деди Виктор Орбан.
Украинага қўшимча ёрдам кўрсатиш, жумладан, аъзолик бўйича музокараларни бошлаш учун Будапештнинг розилигини олиш мақсадида Брюссел Венгрияга музлатиб қўйилган миллиардлаб евроларни очиш масаласини кўриб чиқмоқда, демоқда юқори мартабали амалдорлар.
Рейтерс агентлигига электрон почта орқали юборган жавобида, Орбаннинг матбуот раҳбари Берталан Хаваси, Орбан ва Путин газ ва нефт ташиш ҳамда атом энергияси масалаларини муҳокама қилганини айтди. 2014 йилда тендерсиз тузилган шартномага кўра, Россиянинг "Росатом" энергетика гиганти Венгрияда атом электр стансиясини қурмоқда.
Хавасининг айтишича, Орбан Европа, жумладан, Венгрия учун Россияга қарши санкциялар ва Украинадаги жанглар тугаши ҳамда қочқинлар оқими тўхтаб қолиши жуда муҳим эканини таъкидлаган.
АҚШ Европадан ўзбек ва тожик йўловчиларига транзит визасини жорий этишни сўрамоқда
АҚШ президенти Жо Байден маъмурияти Европа Иттифоқи ва ташкилотга аъзо айрим давлатлардан Ўзбекистон ва Тожикистондан Америкага бораётган йўловчиларга транзит визасини жорий этишни сўрамоқда.
Bloomberg агентлигининг хабар беришича, бу икки давлат фуқароларига нисбатан виза режимининг қатъийлаштирилишидан мақсад эҳтимолий террорчиларнинг АҚШга киришининг олдини олишдир. Хабарда айтилишича, қатор ўзбекистонликлар «ИШИД»га алоқадор контрабандачи воситасида АҚШга Мексика чегарасидан кириб келгани аниқланганидан сўнг, Вашингтон Европа Иттифоқига мана шундай илтимос билан мурожаат қилган.
Марказий Осиёлик мигрантларнинг кўпчилиги Европа Иттифоқи орқали Лотин Америкасига ўтиб, кейин Мексика чегарасидан АҚШга ўтишга уриниши айтилади.