"Рус қўшинлари катта талафон бермоқда"
Махсус операциялар кучлари Россиянинг Донецк чеккасидаги Авдеевка яқинидаги сўнгги 24 соатлик ҳужуми давомида Россиянинг 8 та оғир техникаси йўқ қилинганини маълум қилди.
Ижтимоий тармоқларда Россия техника колонналарининг ўққа тутилиши акс этган видеолар эълон қилинмоқда.
- У ерда жуда шиддатли жанглар кетмоқда. Бу кенг кўламли уруш бошланганидан бери шаҳарга қилинган энг йирик ҳужумдир. Босқинчилар Украина қуролли кучларининг шаҳар атрофидаги позицияларини кучли ўққа тутмоқда, кўп йўналишларда - бир вақтнинг ўзида 10-12 йўналишда ҳужум қилишга уринмоқда. Бу ҳужумлар авиация кўмагида бўлиб ўтмоқда. Тинч аҳоли яшайдиган уйларнинг катта қисми вайрон қилинган, деди Виталий Барабаш, Авдеевка Бош ҳарбий маъмурияти вакили.
"Фронтга яқин ҳудудларда 55 та жанг бўлиб ўтди"
Россия Мудофаа вазирлиги кундалик ҳисоботида рус қўшинлари Купянск, Лиман, Донецк, Запорожье ва Херсон йўналишларида Украинанинг учта танки, тўққизта зирҳли техникаси ҳамда АҚШда ишлаб чиқарилган гаубицалари ва бир нечта ўқ-дори омборларини йўқ қилганини билдирди.
Россия ҳаво ҳужумидан мудофаа кучлари Украинанинг олтита ҲИМАРС ракета тутиб олган 39 та дронини йўқ қилган.
Украина Қуролли кучлари Бош штаби сўнгги 24 соат ичида фронтга яқин ҳудудларда 55 та жанг бўлиб ўтгани ҳақида маълум қилди.
Украина қуролли кучлари Мелитопол ва Баҳмут йўналишида ҳужум амалиётларини давом эттирди, дейилади бош штаб хабарида.
Фаол Россия фашизмга ботгани ҳақидаги мақоласи учун жаримага тортилди
Россиялик ҳуқуқ фаоли Олег Орлов ўз мамлакати фашизмга ботгани ҳақидаги мақоласи учун Россия қуролли кучларини обрўсизлантириш айби билан 150 минг рубль (1500 доллар) миқдорида жаримага тортилди.
70 ёшли Орлов уч йиллик қамоқ жазосига ҳукм қилиниши мумкин эди, бироқ прокуратура унинг ёши ва соғлиғини инобатга олиб жаримага тортишни маъқул кўрган.
Орлов Конституцияга кўра руслар Путиндан бошқача фикрда бўлиш ҳуқуқига эга эканини айтди.
"Менда ҳеч қандай пушаймонлик йўқ. Урушга қарши намойишларга чиққанимдан, бу мақолани ёзганимдан афсусланмайман. Россияни тарк этганимдан ва Мемориал учун ишлаётганимдан пушаймон эмасман. Ҳали кўп йил Мемориал учун ишлайман", деди ҳуқуқ фаоли.
70 ёшли Олег Орлов 2022 йил ноябрида президент Владимир Путин даврида Россия фашизмга қараб кетгани ҳақида ёзган мақоласи учун таъқибга учради.
Орлов ўзининг охирги чиқишида Россия бир томондан ўз қўшнисига қарши уруш бошлаб, бошқа томондан эса эркинлик, тинчлик ва хавфсизликни қўллаб-қувватлаймиз деб даъво қилаётганини таъкидлаган.
Орловни судда 2021йилги Нобел мукофоти совриндори Дмитрий Муратов қўллаб-қувватлади. Муратовнинг «Новая газета» нашри Россиянинг Украинага бостириб киришидан кўп ўтмай фаолиятини тўхтатишга мажбур бўлган эди.
Севастополда рус патрул кемаси минада портлади
Украина Қуролли Кучлари Ҳарбий-денгиз кучлари вакили Дмитрий Плетенчук Россия Қора денгиз флотининг “Павел Державин” кемаси аннексия қилинган Севастопол яқинида шикастланганини айтди. Бу ҳақда у “Озодлик” радиосининг Украина хизматига берган интервьюсида гапирди.
Украина ҳарбий-денгиз кучлари вакилининг аниқлик киритишича, гап Россия кемаси ҳақида кетмоқда, гарчи аввалроқ Украина ҳарбий-денгиз кучларида худди шундай номдаги кема бўлган. Очиқ манбалардаги маълумотларга кўра, "Павел Державин" - 2019 йил феврал ойида ишга туширилган патрул кемасидир.