Херсоннинг ўққа тутилиши натижасида икки киши ҳалок бўлди
Украина президенти девони раҳбари Андрей Ермакнинг сўзларига кўра, ҳалок бўлганлардан бири коммунал хизмат ходими бўлган. Херсон шаҳар ҳарбий маъмурияти раҳбари Роман Мрочко икки ҳалок бўлгани ҳақидаги маълумотни тасдиқлади: тахминан 50-55 ёшли эркак ва аёл.
Сўнгги 24 соат ичида рус қўшинлари Херсон вилоятини тўрт юздан кўпроқ марта ҳужумга тутган.
Херсон вилояти ҳарбий маъмурияти раҳбари Александр Прокудин "Душман 78 та ҳужум уюштирди, миномётлар, артиллерия, “Град”лар, танклар, авиация, дронлардан 445 та снаряд отди, улардан иккитаси ракеталар эди. Икки киши яраланди", деб ёзди.
Украина Ҳарбий-ҳаво кучлари қўмондонлиги малумотларига кўра, Россия Украина бўйлаб 29 та дрон учирди – улардан 24 таси Кировоград, Николаев ва Одесса вилоятлари узра уриб туширилган.
Зеленский Испанияда тарафдорлар билан учрашмоқда
Украина президенти Владимир Зеленский Испаниянинг Гранада шаҳрида Россия босқинидан кейин 40 дан ортиқ давлат ўртасидаги ҳамкорликни муҳокама қилиш учун форумда иштирок этмоқда.
Зеленский 5 октябрь, пайшанба куни Европа сиёсий ҳамжамияти учрашувларнинг асосий вазифаси Европа бирлигини сақлаб қолиш эканини билдирди:
“Бизнинг олдимизда турган асосий вазифа Европа бирлигини сақлаб қолишдир. Мен фақат Европа Иттифоқи давлатлари ҳақида гапирмаяпман, балки бутун Европада, биздаги энг катта муаммо Россия дезинформация, сохта хабарлар билан ҳужум қилишидир. Бу биринчиси. Иккинчидан, Украинанинг қишда ҳимоя қалқони бўлиши жуда муҳим, чунки қишда биз турли русумдаги рус ракеталари, жумладан, Эрон дронлари ва бошқаларнинг кўплаб ҳужумларига дуч келамиз”.
АҚШ президенти Жо Байден Конгрессдаги республикачилар ўртасидаги зиддият АҚШнинг Киевга ёрдамни давом эттириш сиёсатига зарар етказиши мумкинлигидан хавотир билдирганидан сўнг, Испания шаҳрида учрашаётган Европа етакчилари Зеленскийни узоқ муддатли қўллаб-қувватлашга ваъда беришлари кутилмоқда.
Украин аскарлари учун кўринмас ёпинчиқ
Украина Қуролли Кучлари учун инновацион ечимлар топиш билан шуғулланаётган Brave1 платформаси ҳарбийлар учун русларнинг тепловизор камералари ва дронларидан ҳимояловчи ёпинчиқ яратди.
Бу ҳақда Рақамли трансформациялар вазири Михаил Федоров маълум қилди.
"Плаш иссиқлик нурланишини тўсиб, жангчиларни душманга кўринмас қилади. Масалан, жанговар топшириқларни бажараётган бизнинг снайперларимиз ёки махсус кучларимизни", деди Фёдоров.
Таъкидланганидек, бу ёпинчиқ ихчам ва енгил - оғирлиги 2,5 кг гача. У ёмғир ва нам қордан ҳимоя қилади. Бундан ташқари, ёнмаслиги ва юқори ҳароратдан ҳам сақлаши айтилди.
С.Шойгу: Россия армияси Украинадаги жангларга қўшимча эркаклар сафарбар этишни режалаштирмаяпти
"Чунки армияда етарлича ҳарбий хизматчилар бор", деди мудофаа вазири Сергей Шойгу 3 октябр куни.
"Таъкидлашни истардимки, барча чақирилувчилар, жумладан, "янги ҳудудлар"дан (Россия Украинанинг шарқий ва жанубий аннексия қилинган ҳудудларини назарда тутиляпти) сафарбар этилганлар жанглар кетаётган ҳудудга юборилмайди. Бош штабда қўшимча сафарбарлик ишлари бўйича режаси йўқ. Махсус ҳарбий амалиётимизни ўтказиш учун қуролли кучлар зарур миқдордаги ҳарбий хизматчиларга эга”, Россия мудофаа вазири Сергей Шойгу.
Россия мудофаа вазирининг сўзларига кўра, биргина сентябр ойида 50 мингдан ортиқ россиялик вазирлик билан шартнома имзолаган ва 2023 йил бошидан буён 335 мингдан ортиқ киши ҳарбий хизматни бошлаган.