Тоғли Қорабоғда 192 нафар озарбайжонлик ҳалок бўлди
Озарбайжоннинг Тоғли Қорабоғдаги “аксилтеррор чоралари” деб аталган ҳаракатлари давомида 192 нафар озарбайжонлик ҳарбий хизматчи ҳалок бўлди, 512 нафари яраланди,деб хабар бермоқда Республика Соғлиқни сақлаш вазирлиги.
Озарбайжон 19 ва 20 сентябр кунлари минтақада “аксилтеррор операцияси” ўтказиб, ўзини ўзи эълон қилган ташкилот расмийларини таслим бўлишга, маҳаллий қуролли кучларни эса қуролларини ташлашга мажбур қилганидан кейин этник арманлар Тоғли Қорабоғни оммавий равишда тарк этишга уринмоқда.
Мутахассислар минтақа назорати тўлиқ Бокуга ўтгандан сўнг деярли барча этник арманлар (бу эса тақрибан 120 мингдан ортиқ киши) минтақани тарк этиши мумкинлигини тахмин қилмоқда.
Украина президенти: "Террорчи давлатга қарши янги чораларни кўрамиз"
Украина президенти Владимир Зеленский Россияга қарши санкциялар унинг «тажовузкорлигини» тўхтатиш учун етарли эмаслигини айтиб, «террорчи давлат»га қарши янги чора кўришга ваъда берди.
"Биз террорчилар салоҳияти кучайиб кетишининг олдини олиш учун Россияга қайси йўналишда босимни кучайтириш кераклигини аниқ кўриб турибмиз. Санкциялар етарли эмас. Санкциялар ҳам Украинанинг террорчи давлатга қарши ҳаракатлари ҳам кўпаяди. Россиянинг тажовузкорлиги давом этар экан, Россия йўқотишларни ҳис қилиши керак”, деди Владимир Зеленский.
ISW: Украина қўшинлари Новопрокопивкага бостириб киришди
Украина ҳарбийлари Запороже вилоятига чуқур кириб, Новопрокопивкага бостириб киришди, дейди Америка урушни ўрганиш институти таҳлилчилари. Шунингдек, Украина Қуролли кучлари Вербовое қишлоғи томон зарба беришга куч тўпламоқда.
Новопрокопивка - Работинодан 1,5 км жанубда жойлашган олдинги қишлоқ. Ҳозирча эълон қилинган маълумотларнинг расмий тасдиғи йўқ.
БМТ ҳисоботи: "Рус босқинчилари украиналик аёлларни оилалари ёнида зўрлаган, қийнаб ўлдирган"
БМТнинг ваколатли тергов органи Украинадаги уруш жинояти бўйича ўзининг навбатдаги ҳисоботини эълон қилди. Унда айтилишича, рус босқинчилари украиналик аёлларни оилалари ёнида зўрлаган, қийнаб ўлдирган.
"Комиссия узоқ вақт давомида Россия истилоси остида қолган ҳудудлар, хусусан Херсон ва Запорожьедаги қийноқ ҳолатларини тергов қилди. Россия қуролли кучлари ўз назорати остидаги ҳудудларда қийноққа солиш, зўравонликдан кенг фойдаланганини кўрсатувчи далиллар тўпланди. Асосий қийноққа солинганлар Украина қуролли кучларига маълумот етказишда айбланган одамлар бўлган. Комиссия қийноқлар асосан Россия назорати қилган ҳудудлардаги турли ҳибсхоналарда содир этилганини аниқлади", деди ЭРИК МОЗ, Украина бўйича тергов комиссияси раиси.
Россия Украинада ваҳшийликлар содир этгани ва тинч аҳолини нишонга олганини рад этиб келади. Моз комиссиянинг Россия билан алоқа ўрнатишга уринишлари жавобсиз қолганини айтди. Москвага кенгаш тингловида айбловларга изоҳ бериш имконияти берилди, бироқ Россиядан ҳеч бир вакил қатнашмади. Россия Мудофаа вазирлиги изоҳ бериш сўровига жавоб бермади.
"Ушбу қийноқ усуллари турли муассасаларда жабрланувчилардан маълумот олиш учун қўлланилган. Бундан ташқари, комиссия рус аскарлари Херсон вилоятида 19 ёшдан 83 ёшгача бўлган аёлларни зўрлагани, таҳдид ва бошқа ҳуқуқбузарликлар содир этганини аниқлади. Қийноқ ва зўравонлик атайлаб қурбонларнинг оила аъзолари билан ёнма-ён хонада олиб борилган", деди ЭРИК МОЗ.
Комиссия аъзоси Пабло де Греиффдан ўлим билан тугаган қийноқ ҳолатлари сони ҳақида сўралганда, буни билиш ҳозирча имконсиз қолаётгани, аммо бу "жуда катта рақам” эканлигини айтди. Комиссия аввалроқ Украинада рус ҳарбийлари содир этган қийноқлар инсониятга қарши жиноят сифатида кўрилиши мумкинлигини билдирган.