Журналистлар қарийб 35 минг рус аскари ўлимини тасдиқлашди
“Би-би-си” рус хизмати ва “Медиазона” журналистлари, волонтёрлар гуруҳи ёрдамида Украинадаги урушда ҳалок бўлган 34 857 нафар россиялик аскарнинг ўлимини тасдиқлашди. Сўнгги икки ҳафтада рўйхатга 953 та янги исм қўшилди.
Энг кўп талафот сафарбар қилинганлар ҳиссасига тўғри келади. Очиқ манбаларни ўрганган журналистлар сафарбарлик бўйича урушга жўнатилганлар ўлими муносабати билан чоп этилган 4056 та таъзияномани топганлар. Уларнинг мингдан ортиғи 2023 йилнинг июнь ойидан кейин, яъни Украина қарши ҳужуми бошланганидан сўнг ҳалок бўлган.
Уруш даврида 6410 нафар маҳкум ва 3532 нафар кўнгилли ўлгани айтилади.
“Юқорида келтирилган рақамлар – сафарбарлик бўйича хизматга олинган аскарлар ўлимига доир энг консерватив баҳо, чунки биз ўлими очиқ манбаларда тасдиқланган ва аскарнинг мақомини аниқлаш мумкин бўлган ҳолатларнигина ҳисобга олдик”, дейилади журналистлар баёнотида.
Аввалроқ “Медуза” ва “Медиазона” нашрлари ўтказган қўшма суриштирувда, Украинага тўлақонли босқиннинг 15 ойи мобайнида 47 минг россиялик ҳарбий ҳалок бўлгани айтилган эди. Украина Бош штаби Россия тарафидан аскарлар йўқотишини 290 минг кишига баҳоламоқда.
Украина вилоятлари яна ракета ва "Шаҳед" ҳужумлари остида
Россия қўшинларининг Херсон вилоятини янги ўққа тутиши натижасида камида бир киши ҳалок бўлди, яна бир киши яраланди. Бу ҳақда вилоят ҳарбий бошқармаси бошлиғи Александр Прокудин маълум қилди.
Марҳум Берислав шаҳрида яшовчи 80 ёшли қария. Маҳаллий ҳокимият маълумотларига кўра, соʻнгги 24 соат ичида Херсон вилоятидаги аҳоли пунктлари 57 марта артиллерия ва миномётлардан ўққа тутилган. Турар-жой бинолари вайрон бўлди, ёнғинлар бошланди.
20 октябр оқшомида Днепропетровск вилояти Кривой Рог шаҳри икки марта Россия зарбаларига учради. Бу ҳақда шаҳар маъмурияти раҳбари Александр Вилкул маълум қилди.
Унинг сўзларига кўра, иккинчи ҳужум Шаҳед дронларининг рейди билан бирга амалга оширилган.
"Леопард"лар Украина фронтида
2023 йилнинг ёзида украиналик ҳарбийлар узоқ кутилган немисларнинг “Леопард” танкларини қабул қилиб олдилар ва бу танклар бир неча ойдан бери фронтда. Украина Қуролли Кучлари аскарлари "йиртқичларни" мақтайди ва рус ҳарбийлари бу танкларнинг юқори қуввати ва катта аниқликдаги зирҳли тешувчи снарядларидан қўрқишини айтишади.
Татаристонлик депутат Қодировнинг ўғли тақдирлангани масаласини савол остига қўйди
Татаристон Давлат кенгаши депутати, “Единая Россия” партияси аъзоси Азат Хамаев ҳудудий қонунчилик органи йиғилишида Чеченистон раҳбарининг ўғли Адам Қодиров 19 ёшли Никита Журавелни калтаклагани учун тақдирлангани масаласини кўтарди. “7х7” нашри унинг нутқидан парча келтирган. Бироқ кейин Хамаев ўз таъбирича “ҳиссиёт билан айтган сўзлари” учун узр сўраб чиқди.
“Мен ўзимга ўзим берадиган биринчи савол: биз бугун қанақа ҳуқуқий майдонда яшаяпмиз? РФ субъекти раҳбари ўз ўғлига бир одамни дўппослагани учун қаҳрамон унвонини бермоқда. Ва янада ошириб, уни ҳатто барча мусулмонларнинг қаҳрамони, деб атаяпти. Бу қанақаҳуқуқий майдон бўлди, ким жавоб беради?”, деди Хамаев.
Давлат кенгашида ўша куни ёшларни ватанпарварлик руҳида тарбиялашга доир қонун лойиҳаси муҳокама қилинган, депутатлардан ҳеч бири унинг сўзларига изоҳ берган эмас.
Кейинроқ Хамаев ўз сўзлари учун узр сўради.
“Республика Давлат кенгаши йиғилишида билдирган фикрим мутлақо шахсий бўлиб, ҳамкасбларим тарафидан қўллаб қувватланмади. Икки биродар халқнинг ўзаро алоқаларига зарар етказиши мумкин бўлган ушбу ҳиссиётли сўзларим учун узр сўрайман”, деди депутат Хамаев.
Татаристон раҳбари Рустам Минниханов Хамаевнинг сўзлари республика мусулмонлари позициясига ҳеч бир тариқа дахлдор эмаслигини ва “Татаристонда қардош чечен халқига ҳамиша ҳурмат билан қаралган”ини айтди.
Азат Хамаев чиқиш қилган йиғилиш видеоёзуви кейинроқ ҳудудий парламентнинг “ВКонтакте”, Rutube ва “Одноклассники”даги барча расмий саҳифаларидан ўчирилди.
Адам Қодиров Грознийдаги тергов ҳибсхонасида Қуръонни ёқишда айбланаётган Никита Журавелни калтаклагани ортидан машҳур бўлиб кетди. Чеченистон раҳбари Рамзан Қодиров ўғли Адам ростдан ҳам Журавелни урганини тан олиб, унинг бу ишини маъқуллади, шунингдек ўғли Журавелни дўппослаётгани видеосини эълон қилди.
Baza ёзишича, полиция воқеа юзасидан жиноят иши қўзғатишни рад этган. Кўп ўтмай кичик Қодировга Чеченистон қаҳрамони унвони берилди.