Арманилар Тоғли Қорабоғдан кетди
Ереван маълумотларига кўра, йил бошида Тоғли Қорабоғдаги арман аҳолиси 120 минг кишига етган.
Тан олинмасдан йўқ бўлган республиканинг собиқ вакилларининг сўзларига кўра, ҳозир вилоят деярли бутунлай бўшаб қолган.
Тоғли Қорабоғдан охирги 15 киши Арманистонга етиб келди
Арманистон бош вазири матбуот котиби Назели Багдасарян сўнгги 24 соат ичида Тоғли Қорабоғдан Арманистонга ички кўчирилганлар оқимининг интенсивлиги сезиларли даражада камайди, “жараён ўзининг мантиқий якунига етмоқда”, дея хулоса қилди.
Фаолиятини якунлаган Тоғли Қорабоғ Республикаси омбудсмани Гегам Степаняннинг сўзларига кўра, Якшанба куни Тоғли Қорабоғдан келган қочқинлар бўлган сўнгги автобус Горис шаҳрига етиб келган. Унда 15 киши бор эди.
Арманистон расмийларига кўра, 1 октябр оқшомида мамлакатга Тоғли Қорабоғдан 100 514 нафар ички кўчирилганлар келган.
Россия "Шаҳед"лар ҳужуми бўйича рекорд ўрнатди
Сентябр ойида Россия қўшинлари Украинага 503 та “Шаҳед” дронлари билан ҳужум қилди. Defense Express ахборот-консалтинг ширкати ҳисоб-китобига кўра, бу тўлақонли босқин бошланганидан бери Украинага қарши бир ой мобайнида қўлланган дронлар сони бўйича рекорд кўрсаткичдир.
Маълум қилинишича, сентябр давомида жами 19 кун Украина ҳудудларига Россия тарафидан дрон ҳужумлари бўлган. Ҳар ҳужумда ўртача 26 тадан дрон учирилган, икки марта эса 44 тадан дрон йўлланган. Зарбалар орасидаги энг узоқ танаффус атиги икки кунни ташкил қилган. Украина ҳарбийлари 396 та дронни уриб туширишга муваффақ бўлганлар.
Defense Express ёзишича, Россия “Шаҳед” дронларини Эрондан қанча баҳога сотиб олаётгани маълум эмас, аммо уларнинг тахминий таннархи 20 мингдан 40 минг долларгача. Яъни, Россия дронларни таннархида сотиб олган бўлса, бунинг учун 10 миллиондан 20 миллион долларгача сарф қилган бўлиши мумкин.
Бироқ дронлардан ҳимояланиш Украинага дронлар таннархига нисбатан анча қимматга тушяпти. “Ҳар битта “Шаҳед-136” дронига битта NASAMS ракетаси сарфланган, деб фараз қиладиган бўлсак, сентябрда Украина ўзини дронлардан муҳофаза қилишга 654 млн доллар чиқим қилган”, дея қайд этади Defense Express.
Россия Украинага ракета ва дрон ҳужумларини давом эттирди
2 октябрга ўтар кечаси Россия Украинага яна дронлар билан ҳужум қилди, шунингдек 150 дан ортиқ аҳоли масканини артиллериядан ўққа тутди, дея маълум қилмоқда Украина армияси Бош штаби.
Айтилишича, “Шаҳед”лар Донецк, Запорожье, Луганск, Харьков ва Херсон вилоятларига ҳужум қилган. Айни ҳудудлар, шунингдек Суми ва Чернигов вилоятлари ракета зарбаларига ҳам учраган.
Тунги ҳужумлар чоғида Харьков вилоятининг Волчанск шаҳрида бир нафар фуқаро ҳалок бўлган, ёнғинлар чиққан, хусусий уйлар ва ноҳарбий корхоналар биноларига шикаст етган, деб ёзди вилоят раҳбари Олег Синегубов.
Херсонда тўрт киши жабрланди. Бир нафар тинч фуқаро бир оёғидан ажралди, яна бир киши енгил жароҳат олди, дея маълум қилди Украина ички ишлар вазири Игорь Клименко. Мулозимга кўра, полиция патрул автомобили устига снаряд тушган. Икки полициячи касалхонага ётқизилган, улардан бирининг аҳволи жуда оғир.