Олмаотанинг Хитойдаги консуллиги олдига Шинжондаги туб халқларга нисбатан “геноцидни тўхтатиш” талаби билан пикетга чиққан фаол Байбўлат Кунбўлатули 10 суткалик маъмурий ҳибсга олинди. Бунга оид қарор фаолни “тинч йиғилишлар уюштириш ва ўтказиш тартибига оид қонунчиликни бузганлик”да айблаган Олмаота суди томонидан 9 февраль оқшомида чиқарилди.
Жорий ҳафтада бир неча одам Хитойнинг Олмаотадаги дипломати ваколатхонаси олдида икки пикет (8 ва 9 февраль кунлари) уюштириб, Шинжондаги яқинлари асоссиз айбловлар билан судлангани ёки хитойлик расмийлар яқинларининг паспортини олиб қўйганлари учун улар Қозоғистонга чиқа олмаётганини билдиргандилар.
Сешанба куни Кунбўлатули Шинжондаги яқинларини озод қилишни талаб қилган бошқа этник қозоқлар билан биргаликда консуллик биноси олдига чиққан. 9 февраль оқшомида фаол полициячилар томонидан уйидан олиб кетилган. Акциянинг бошқа иштирокчилари қўлга олинган-олинмагани ҳақида ҳозирча маълумот йўқ.
Кунбўлатули ўтган ҳафтада ҳам пикетга чиққан бўлиб, ўшанда ҳам қўлга олинганди. 1 февраль куни суд фаолга тинч йиғилишлар ўтказиш тартибини бузганлик учун огоҳлантириш берган.
Асли хитойлик қозоқ бўлган ва Қозоғистонга келиб, фуқаролик олган Кунбўлатули аввалроқ журналистларга 2018 йил мартида укаси Шинжоннинг Ғулжа уездига қарашли Қарағаш қишлоғидан тутиб кетилиб, “сиёсий қайта тарбиялаш лагери”га йўлланганини билдирган. Кейинроқ унинг укаси номаълум айбловлар билан 10 йилга қамалган. Кунбўлатули бу борада қилган мурожаатига Қозоғистон Ташқи ишлар вазирлиги “бу Хитойнинг ички иши” дея жавоб қайтарганини айтган. Хитойлик дипломатлар эса, фаолга кўра, сўров бўйича ҳеч қанақа жавоб бермаяптилар.