Россия Беларусга “яқин орада” 1,5 миллиард долларлик қарзнинг иккинчи транши бўлган 500 миллион долларни беради. Бу ҳақда Путиннинг матбуот котиби Дмитрий Песков Россия матбуотига билдирган.
Бу масала, ТАСС агентлиги хабарига кўра, Путин билан Лукашенконинг Сочида бўлиб ўтган учрашувида муҳокама қилинган. Песков бу борада “учоқ билан боғлиқ воқеаларгача” эълон қилинганини урғулаб, иккинчи транш июнь ойи охиригача берилишини тасдиқлаган.
Ўтган йил сентябрида Россия Беларусга 1,5 миллиард доллар кредит ажратишга ваъда қилганди. 500 миллион долларлик биринчи транш Беларусга 2020 йилнинг декабрь ойи охирида келиб тушган.
Песковга кўра, Лукашенко билан Сочидаги учрашувда Путин Минскда қўлга олинган россиялик Софья Сапега мавзусини ҳам кўтарган. “Табиийки, унинг тақдирига бефарқ эмасмиз, бироқ унда Беларусда яшаш учун рухсатнома бўлгани ҳам тасдиқлангани эътиборга оламиз. Биз албатта барчаси қонун доирасида бўлиши лозимлигидан келиб чиқамиз ва бу Россия президенти томонидан ҳам таъкидланди”, деган Д. Песков.
Лукашенко Сочига 28 май куни борган. Ўша куни унинг Россия президенти билан учрашуви 5 соатдан кўпроқ давом этган. Бу учрашувдан сўнг ҳеч қанақа баёнот берилган эмас.
Бу Александр Лукашенконинг йил бошидан буён Владимир Путин билан учинчи учрашувидир.