АҚШ Конгрессининг Вакиллар палатаси “Беларусь халқини ва унинг демократик интилишларини дастаклаш ҳамда сайлов натижалари сохталаштирилишини ва унинг ортидан Лукашенконинг нолегитим режими томонидан тинч намойишлар бешафқат бостирилишини қоралаш тўғрисида”ги резолюцияни маъқуллади.
“Америка овози” хабарига кўра, резолюцияни Конгресс аъзоларининг аксари қисми — 355 киши ёқлаган. Конгрессменлардан 69 нафари қарши овоз берган бўлса, яна беш нафар аъзо овоз беришда иштирок этмаган.
Резолюция матнида Лукашенко режимидан норозилигини ифода этган Беларусь фуқаролари, жумладан журналистлар қатағон қилинганини тасдиқловчи далиллар келтирилган. Мустақил матбуотнинг бир неча вакили ҳақиқий қамоқ жазосига ҳукм қилинган ёки улар тергов изоляторларида сақланмоқда.
Ҳужжатда зикр этилганлар орасида машҳур блогер, “Озодлик” радиоси Беларусь хизмати медиамаслаҳатчиси Игорь Лосик ҳам бор. Унинг оммавий тартибсизликлар уюштиришда иштирок этиш айблови билан ҳибсхонага ташланганига чоршанба куни 300 кун тўлди. Лосик ҳамон суд қилингани йўқ, у 6 ҳафтадан бери норозилик тариқасида очлик эълон қилган.
Озод Европа /Озодлик радиоси президенти Жейми Флай 21 апрель куни Лосикни дарҳол тутқунликдан озод этишга чақирди. У, шунингдек, Лукашенко режимининг мустақил матбуот, хусусан, журналистлари расмий аккредитациядан маҳрум этилган Озодлик радиосига қарши олиб борилаётган “қатағон сиёсати”ни қоралаб чиқди.
Резолюцияда АҚШнинг 9 август куни Беларусда бўлиб ўтган президент сайлови натижаларини, бу сайловлар “на эркин, на ҳалол” бўлгани учун тан олмаслиги, мухолифатнинг Мувофиқлаштириш кенгашини ҳокимиятни тинч йўл билан топшириш бўйича мулоқотда иштирок этиш учун қонуний орган сифатида эътироф этиши таъкидланган.
Матнда Минскка нисбатан санкция қўллаш сиёсатини Европа Иттифоқи ва бошқа иттифоқчилар билан келишган ҳолда юритишга чақирилган. Резолюция тавсиявий мазмунга эга.
Жорий йил 19 апрелида АҚШ Давлат департаменти Беларусдаги қатор ширкатларига қарши санкциялар эълон қилганди.
Александр Лукашенко яқинда АҚШ ҳукуматини унга суиқасд тайёрлашда айблаб чиққан. Беларусь президентига кўра, сиёсий мухолифлари Америка махсус хизматлари кўмагида унга қарши фитна ҳозирлаганлар. Россия президенти Владимир Путин чоршанба куни Федерал кенгашга йўллаган мурожаатида бу иддаони тасдиқлаган. 22 апрель куни Лукашенко ва Путин Москвада учрашиши кутилмоқда.