Ливияга борган сари кўпроқ қурол-аслаҳа ва ёлланма аскар оқиб келмоқда, бу эса мамлакат ҳудудидаги бир-бирларига қарши курашаётган гуруҳлар ўртасидаги зиддиятни янада таранглаштиради. Бу ҳақда БМТнинг Ливиядаги махсус элчиси Стефани Уильямс билдирди.
БМТ Хавфсизлик кенгаши аъзолари мурожаат қилар экан, элчи хоним Ливиядаги вазият хавотирли эканини айтиб, халқаро ташкилотни “мамлакатга хорижий ҳомийлар томонидан тобора такомиллашиб ва ўлдирувчи бўлиб бораётган қуролларнинг бетўхтов юборилишини тўхтатиш”да кўмак беришга чақирди. Унга кўра, пировардида қуролли тўқнашув тобора кенгайиб боради ва бунинг ливияликлар учун оқибати оғир бўлади.
Уильямс Ливияга коронавирус ҳам катта талафот етказаётганини, айни пайтда хасталик ёйилиши ўз чўққисига чиқишига ҳали эрта эканини қўшимча қилди.
Элчи хонимнинг баёноти БМТ томонидан дастакланган Ливия Миллий муроса ҳукумати кучлари исёнчи генерал Халифа Ҳафтар жангарилари назорати остида бўлган йирик ҳарбий базани эгаллаб олганининг эртасига янгради.
Ғарб агентликларининг қайд этишича, Ҳафтар бошчилигидаги Ливия миллий армиясига Бирлашган Араб Амирликлари, Миср ва Россия, Триполидаги Миллий Муроса ҳукуматига эса Туркия раҳбарияти кўмак кўрсатмоқда. Туркия президенти Ражаб Тоййиб Эрдўғон Ливияда россиялик ёлланма аскарлар юрганини бир неча бор баён қилган.
Май ойида БМТ экспертлари ҳам Ҳафтар армиясига сўнгги ойларда “Вагнер хусусий ҳарбий ширкати”нинг (Россия) 800 дан 1200 гача ёлланма аскари келиб қўшилганини билдирганлар. “Вагнер ХҲШ”ни оммавий ахборот воситалари президент Владимир Путин атрофидаги одамлар билан боғлайдилар.
Россиянинг БМТдаги элчиси Василий Небензя халқаро экспертларнинг “Вагнер ХҲШ”га оид маълумотларига изоҳ бераркан, мазкур ҳисоботнинг катта қисми текширилмаган ёки атайлаб сохталаштирилган маълумотларга асосланганини билдирган. Шунингдек, у ҳисобот Россия расмийларининг Ливияга нисбатан сиёсатини обрўсизлантиришга қаратилганини иддао қилган.