Британиянинг икки ой олдин Эронда қўлга олинган Stena Impero танкери экипажининг 7 аъзоси озодликка чиқарилди.
Эрон Ташқи ишлар вазирлиги матбуот котиби Аббос Мусовий Россия ва Ҳиндистон фуқаролари бўлган етти денгизчи гуманитар сабабларга кўра озодликка чиқарилганини, улар тез орада мамлакатни тарк эта олишларини айтди.
Котиб етти шахсни кема капитани танлаганини қўшимча қилди.
Июль ойида Буюк Британия Ҳарбий-денгиз флотига қарашли патруль кемаси Гибралтарнинг сув ҳудудида Эрон нефть ташувчи кемасини ҳибсга олган эди. Бунинг ортидан Эрон Британиянинг Stena Impero кемасини ва унинг бортидаги 23 нафар экипаж аъзосини қўлга олди.
Эрон кемаси Сурияга кетмаётгани айтилганидан кейин қўйиб юборилган.
Кейинги ойларда Форс кўрфазида бир неча марта нефть танкерларига ҳужум қилинди. АҚШ ушбу ҳужумлар ортида Эрон турганини айтиб келади. Шу сабаб АҚШ президенти Дональд Трамп кўрфаздан ўтувчи кемалар хавфсизлигини таъминлаш учун ҳудудга халқаро назорат кемаларини юборишга чорлаб келади.