Эрон президенти Ҳасан Руҳоний Теҳрон АҚШ билан икки тарафлама музокара олиб бормайди, деб баёнот берди. Президент Эронга қарши санкциялар бекор қилинса, Теҳрон бир неча тараф иштирокида ўтказиладиган музокараларда қатнашишга тайёр эканлигини қўшимча қилди.
3 сентябрь куни Эрон парламенти сессиясида сўзга чиққан Руҳоний Эрон 2015 йилда эришилган келишувга биноан ўз зиммасига олган мажбуриятларга амал қилишни тўхтатишда давом этишини айтди.
Президент АҚШ санкциялари бекор қилинса, Теҳрон ва БМТ Хавфсизлик кенгашининг доимий аъзолари иштирокида музокара олиб бориш мумкин бўлишини билдирди.
Трамп АҚШни 2015 йилда Эрон ядровий дастури бўйича эришилган келишувдан чиқариб олиб, Эронга қарши санкция жорий қилган. Шундай бўлса-да, Трамп Эрон етакчилари билан учрашишга тайёр эканлигини изҳор қилган. Эрон расмийлари эса ҳар қандай музокара ўтказишдан олдин санкциялар бекор қилиниши кераклигини айтиб, Трамп таклифини рад этиб келади.
Руҳоний АҚШ келишувдан чиққанидан кейин, уни имзолаган Европа давлатлари ўз мажбуриятларини бажармай қўйганини таъкидлади.
Шу кунларда Эрон расмийлари Францияда ядровий келишувни ўз кучида сақлаб қолишни кўзлаб уюштирилган якуний музокараларда иштирок этмоқда.