АҚШ президенти Дональд Трамп келаётган дам олиш кунлари Польшага қиладиган сафарини бекор қилди. Унинг ўрнига АҚШ делегациясига вице-президент Майк Пенс раҳбарлик қилади.
Трамп “Дориан” довули Флоридага яқинлашиб келаётгани муносабати билан Вашингтонда қолишни маъқул топганини айтди. Довул штатга жиддий зарар етказиши эҳтимоли бор.
"Дориан” довули Флоридага 31 август куни етиб келиши тахмин қилинмоқда. Синоптиклар “Дориан” сўнгги 27 йил ичида Флоридада юз берган энг кучли довул бўлишини айтмоқдалар.
Трамп Польша пойтахти Варшавада 1 сентябрь куни Икинчи жаҳон уруши бошланганининг 80 йиллиги муносабати билан ўтадиган тадбирда иштирок этиши лозим эди. Мазкур тадбир доирасида Трампнинг Украина президенти Володимир Зеленский билан илк маротаба учрашиши кутилаётган эди. Тадбирга Россия президенти Владимир Путин таклиф қилинмаган.
Аввалроқ Трамп сентябрь ойида Данияга қиладиган сафарини ҳам бекор қилганди. Бунга Дания ҳукумати АҚШга Гренландияни сотмаслигини эълон қилгани сабаб бўлган. Бунга қадар Трамп Даниядан Гренландияни сотиб олиш масаласига қизиқаётгани хабар қилинган эди.