Россия президенти Владимир Путин 3 апрель куни Анқарада Туркия президенти Режаб Тоййип Эрдўғон билан учрашувида бошқа масалалар қаторида Туркияга С-400 зенит ракеталари тизимини етказиб беришни тезлаштириш масаласини муҳокама қилганини билдирди.
-Албатта, биз Россия ва Туркия ўртасида ҳарбий технологиялар соҳасидаги ҳамкорлик босқичларини ҳам муҳокама қилдик. Жумладан, Туркияга С-400 “Триумф” зенит ракета комплексини етказиб бериш бўйича олға силжишларга эришилди. Биз юқори самарадорликка эга бу мудофаа комплексини етказиб бериш вақтини тезлаштиришга муваффақ бўлдик, -деди Путин.
Россия президентининг бу баёноти Туркиянинг НАТОдаги ҳамкорларида ташвиш уйғотди.
Аввал С-400 тизимини Туркияга 2019 йил охири, 2020 йил бошларига етказиб бериш режалаштирилган эди.
Анқара учрашувида Путин ва Эрдўғон Россия томонидан Туркияда қуриладиган биринчи атом электр станцияси тамал тошини қўйиш маросимида иштирок этган эди. Мазкур лойиҳанинг қиймати 20 миллиард долларни ташкил этади.
4 апрель куни Путин ва Эрдўғонга Эрон президенти Ҳасан Руҳоний ҳам келиб қўшилади. Бу уч давлат лидерлари Анқарада Сурия муаммосини муҳокама қиладилар.